ریڈیو کے مشہور اناؤنسر امین سیانی کا انتقال

ریڈیو کے مشہور اناؤنسر اور ٹاک شو کے میزبان امین سیانی کا دل کا دورہ پڑنے سے انتقال ہو گیا۔ ان کی عمر 91 برس تھی۔ مرحوم کے خاندانی ذرائع نے میڈیا کو بتایا کہ امین سیانی کے قلب پر منگل کی شام 6 بجے حملہ ہوا اورانھیں جنوبی ممبئی میں واقع ایچ این ریلائنس فاؤنڈیشن ہاسپٹل لے جایا گیا جہاں ان کا انتقال ہوگیا۔

امین سیانی کو ہائی بلڈ پریشر اور عمر سے متعلق دیگر امراض لاحق تھے اور وہ گزشتہ12 سال سے کمر درد میں بھی مبتلا تھے اور اسی وجہ سے انہیں واکر کا استعمال کرنا پڑتا تھا۔ ذرائع کے مطابق امین سیانی کی آخری رسومات کل یعنی 22 فروری کو ممبئی میں ادا کی جائے گی۔

امین سیانی 21 دسمبر 1932 کو ممبئی میں پیدا ہوئے۔ امین سیانی نے ریڈیو کی دنیا میں بڑا نام کمایا۔ ان کی آواز کا جادو لوگوں کے دلوں میں گھر کر گیا۔ امین سیانی نے اپنے کیریئر کا آغاز آل انڈیا ریڈیو، ممبئی سے بطور ریڈیو پریزنٹر کیا۔

امین سیانی کے ریڈیو سیلون اور پھر وِوِدھ بھارتی پر تقریباً 42 سال تک جاری رہنے والے ہندی گانوں کے پروگرام ‘بناکا گیت مالا’ نے کامیابی کے تمام ریکارڈ توڑ دئے تھے اور لوگ ہر ہفتے انھیں سننے کے لیے بے تاب رہتے تھے۔ ‘گیت مالا’ کے ساتھ امین ہندوستان کے پہلے ریڈیو میزبان تھے، جنہوں نے ابھرتے ہوئے موسیقی کے منظر نامے کے بارے میں اپنی گہری سمجھ بوجھ کو ظاہر کرتے ہوئے ایک مکمل شو تیار کیا اور پیش کیا۔ بنا کا گیت مالا پروگرام کے ذریعہ ان کی آواز ہر گھر میں گونجا کرتی تھی اورلوگ ان کے اس پروگرام کا شدت کے ساتھ انتظارکرتے تھے۔

امین سیانی کے نام پر 54000 سے زیادہ ریڈیو پروگرام تیار کرنے، موازنہ کرنے اور وائس اوور کرنے کا ریکارڈ ہے۔ تقریباً 19000 جِنگلز کو آواز فراہم کرنے پر امین سیانی کا نام لمکا بک آف ریکارڈز میں بھی درج ہے۔ ان کے انتقال پر کئی اہم شخصیات نے گہرے رنج کا اظہارکیا ہے۔