Imran Hussain 
حیدرآباد ۔ تلنگانہ چیف منسٹر ریونت ریڈی نے اعلان کیا ہے کہ وہ بی آر ایس دور حکومت میں برقی کی خریداری کیلئے چھتیس گڑھ سے کئے گئے معاہدہ کے علاوہ بھدرادری کوتہ گوڑم میں 1080میگاواٹ کے پراجکٹ کے معاہدے اوریادادری تھرمل پراجکٹ کے سلسلہ میں بی ایچ ای ایل سے ہوئے معاہدہ کی عدالتی تحقیقات کروائی جائے گی۔
وزیراعلیٰ نے اسمبلی میں اس مسئلہ پر بیان دیتے ہوئے کہا کہ حکومت کی جانب سے سابق وزیر جگدیش ریڈی کے چیلنج کو قبول کیا جاتا ہے۔ انہوں نے کہا کہ محکمہ برقی میں اسکامس کی تحقیقات کروائی جائیں گی۔ ریونت ریڈی نے مزید کہا کہ سابق حکومت نے سرکاری ملازم کو ہراساں کیا جس نے چھتیس گڑھ سے کئے گئے معاہدہ غلط قرار دیا تھا۔ انہوں نے یہ بھی کہا کہ اس عہدیدار کا تبادلہ دور دراز کے علاقہ میں کردیا گیا اور ان کی تنزلی کی گئی ۔
ریونت نے تنقید کرتے ہوئے کہا کہ اگر انہوں نے چھتیس گڑھ معاہدے کے بارے میں سوال کیا تھا تو انہیں اسمبلی میں مارشل کے ذریعہ باہر کردیا گیا تھا اور تمام حقائق سامنے لانے کی ضرورت ہے۔
