تین سے زائد بچے ہونے پر خواتین کو نہیں ملے گا سرکاری اسکیموں سے فائدہ

آسام کی بی جے پی حکومت نے اعلان کیا ہے کہ اگر خواتین کے تین سے زیادہ بچے ہوں تو انہیں سرکاری اسکیموں کا فائدہ نہیں ملے گا۔ ریاست کے چیف منسٹر ہیمنتا بسوا سرما نے گوہاٹی میں خواتین کے لیے مہیلا انٹرپرینیورشپ اچھونی اسکیم کا آغاز کیا، جس کے لیے کچھ شرائط عائد کی گئی ہیں۔ شرائط کے مطابق جن خواتین کے تین سے زیادہ بچے ہیں انہیں اس سکیم کا فائدہ نہیں ملے گا۔

چیف منسٹر ہیمنتا بسوا سرما نے اسکیم کے بارے میں جانکاری دی۔ انہوں نے بتایا کہ اسکیم کے تحت ریاست میں سیلف ہیلپ گروپس کی 39 لاکھ خواتین کو تین سالوں کے اندر تین مرحلوں میں اس اسکیم کے تحت کاروبار کرنے کے لیے کچھ شرائط کے ساتھ مالی امداد دی جائے گی۔ اس کے لیے 145 کاروباری ماڈلز کی نشاندہی کر کے ان کا انتخاب کیا گیا ہے۔

ریاستی حکومت کی طرف سے دیہی خواتین کاروباریوں کے لیے شروع کی گئی اس اسکیم کے لیے کچھ شرائط عائد کی گئی ہیں۔ اس میں ایک عورت کے بچوں کی تعداد کی حد بھی شامل ہے۔ شرائط کے مطابق اگر جنرل اور او بی سی زمرے کی خواتین اس اسکیم کا فائدہ اٹھانا چاہتی ہیں تو ان کے 3 سے زیادہ بچے نہیں ہونے چاہئیں۔ وہیں، درج فہرست قبائل (ایس ٹی) اور درج فہرست ذات (ایس سی) خواتین کے لیے یہ حد چار بچوں کی ہے۔