دفاعی چیمپئن انگلینڈ ورلڈ کپ سے باہر

دفاعی چیمپئن انگلینڈ اس بار کے ون ڈے ورلڈ کپ سے باہر ہو گیا ہے۔ احمد آباد کے نریندر مودی اسٹیڈیم میں آسٹریلیا کے ہاتھوں ٹیم کو 33 رنز سے شکست ہوئی۔ 7 میچوں میں 6 شکستوں کے بعد انگلینڈ سیمی فائنل کی دوڑ سے باہر ہونے والی دوسری ٹیم بن گئی۔ ان سے پہلے بنگلہ دیش بھی باہر ہو چکا تھا۔

ٹاس ہار کر پہلے بیٹنگ کرتے ہوئے آسٹریلیا نے 286 رنز بنائے۔ مارنس لیبوشگن نے سب سے زیادہ 71 رنز بنائے۔ ہدف کے تعاقب میں انگلینڈ کی ٹیم 48.1 اوورز میں 253 رنز پر آل آؤٹ ہوگئی۔ بین اسٹوکس نے 64 اور ڈیوڈ ملان نے 50 رنز کی نصف سنچری اسکور کی۔ آسٹریلیا کی جانب سے ایڈم زمپا نے 3 جبکہ انگلینڈ کی جانب سے کرس ووکس نے 4 وکٹیں حاصل کیں۔