آندھرا پردیش کے سابق وزیر اعلیٰ جگن موہن ریڈی پر اقدام قتل کا مقدمہ درج، رگھورام کرشن راجو نے لگائے سنگین الزامات

آندھرا پردیش پولیس نے ریاست کے سابق وزیر اعلیٰ وائی ایس جگن موہن ریڈی، دو سینئر آئی پی ایس افسران اور دو ریٹائرڈ افسران کے خلاف ’اقدام قتل‘ کا مقدمہ درج کیا ہے۔ یہ مقدمہ حکمراں پارٹی تلگو دیشم ایم ایل اے، کے رگھورام کرشن راجو کی شکایت پر، اےپی کی گنٹور پولیس نے آئی پی سی کی دفعہ 120بی، 166، 167، 197، 307، 326، 465 اور 506 کے ساتھ ہی دفعہ 34 کے تحت درج کیا ہے۔

گنٹور پولیس نے بتایا کہ ٹی ڈی پی کے ایم ایل اے رگھورام کرشن راجو نے ایک ماہ قبل اپنی شکایت میل کے ذریعے پولس کو بھیجی تھی۔ قانونی مشورہ کے بعد ہم نے جمعرات کی شام 7 بجے سابق وزیر اعلیٰ اور دیگر کے خلاف مقدمہ درج کیا ہے۔

پولیس کی اطلاع کے مطابق ان مقدمات میں سابق وزیر اعلیٰ جگن موہن ریڈی کے علاوہ سینئر آئی پی ایس افسرپی وی سنیل کمار اور پی ایس آر سیتارامن جنیئول، ریٹائرڈ پولیس افسر آر وجے پال اور گنٹور گورنمنٹ جنرل اسپتال کی سابق سپرنٹنڈنٹ جی پربھاوتی کے نام شامل ہیں۔ وجے پال اور پربھاوتی ریٹائر ہو چکے ہیں۔

پولیس کے مطابق یہ معاملہ تین سال پرانا ہے جو گنٹور کے ناگرم پالم پولیس اسٹیشن میں کیس درج کیا گیا تھا۔ ٹی ڈی پی لیڈر راجو کی 2021 میں گرفتاری کا معاملہ آندھرا پردیش میں اس وقت سامنے آیا جب انہوں نے 11 جون کو سابق وزیر اعلیٰ جگن موہن ریڈی اور کچھ دیگر عہدیداروں کے خلاف شکایت درج کرائی۔ اس شکایت میں انہوں نے حراست کے دوران ہراساں کرنے کا الزام بھی لگا یا ہے۔