چوتھی بار کا عزم: چندرابابو نائیڈو کی عظیم واپسی

تلگودیشم پارٹی کے سربراہ این چندرابابو نائیڈو کے لئے یہ ایک جذباتی لمحہ تھا جب انہوں نے وزیراعظم نریندر مودی، کئی مرکزی وزراء اور ہزاروں افراد کی موجودگی میں چہارشنبہ کو بہ حیثیت چیف منسٹر آندھراپردیش حلف لیا۔ 74 سالہ لیڈر چوتھی مرتبہ چیف منسٹر بنے ہیں۔ نومبر 2021ء میں منعقدہ انتخابات میں ان کی پارٹی کو شکست ہوئی تھی تاہم 2024ء کے انتخابات میں تلگودیشم پارٹی واضح اکثریت کے ساتھ کامیاب ہوئی ہے۔ یو این آئی کے مطابق حلف برداری کی اس تقریب میں وزیراعظم کے علاوہ سابق نائب صدرجمہوریہ وینکیانائیڈو، مرکزی وزراء امیت شاہ، جے پی نڈا، نتن گڈکری، بنڈی سنجے، کشن ریڈی، رام داس اٹھاولے، ا ین سی پی لیڈرپرافل پٹیل، اداکار رجنی کانت، سپریم کورٹ کے سابق چیف جسٹس این وی رمنا، سابق گورنر تلنگانہ ٹی سوندراراجن اور کئی دیگر افرادنے شرکت کی۔ حلف برداری کی یہ تقریب وجئے واڑہ کے مضافات میں واقع کیسراپلی میں گناورم ایرپورٹ کے قریب صبح 11.27 بجے منعقد ہوئی۔گورنر عبدالنذیر نے چندرابابوکو عہدہ اور رازداری کا حلف دلایا۔نائیڈو کے ساتھ جناسینا کے سربراہ پون کلیان، چندرابابو کے فرزند نارا لوکیش،کے اچن نائیڈو،کے رویندر، این منوہر،پی نارائنا، اے ونگلاپوڈی، ستیہ کماریادو، این رامانائیڈو،این محمد فاروق،اے رام نارائن ریڈی،پی کیشو،اے ستیہ پرساد،کے پارتھاسارتھی،بی وی سوامی،جی روی کمار،کے درگیش،جی ایس رانی، بی سی جناردھن ریڈی،ٹی جی بھارت، بی سویتا،وی سبھاش،کے سرنواس اور رام پرساد ریڈی نے بھی حلف لیا۔چندرابابو کی کابینہ میں 13اوسی، 7بی سی، 2ایس سی،1ایس ٹی،ایک مسلمان کو جگہ دی گئی ہے۔منگل کو الگ الگ اجلاس میں، تلگودیشم لیجسلیچر پارٹی اور این ڈی اے کے شامل جماعتوں بی جے پی اور جناسینا نے نائیڈو کو اپنا لیڈر منتخب کیاتھا۔ نائیڈو پہلی بار 1995 میں غیر منقسم آندھرا پردیش کے چیف منسٹر بنے اور مسلسل دو میعادوں تک اس عہدہ پر فائز رہے۔ 2014 میں وہ متحدہ آندھراپردیش کی تقسیم کے بعد موجودہ آندھرا پردیش کے پہلے چیف منسٹر بنے اور 2019 تک اس عہدے پر رہے۔2024 کے انتخابات میں بھاری اکثریت سے کامیابی کے بعد، چندرابابو نائیڈو ایک مرتبہ پھر اس ریاست کے چیف منسٹر بنے ہیں۔ آندھرا پردیش میں این ڈی اے، جس میں تلگودیشم، بی جے پی اور جناسینا شامل ہیں، نے 164 نشستوں کے ساتھ اسمبلی میں زبردست اکثریت حاصل کی ہے۔اس اتحاد کو ریاست کے 25 میں سے 21 پارلیمانی حلقوں پر کامیابی ملی۔