Imran Hussain 
مرکزی وزیر سیاحت جی کشن ریڈی نے عہدیداروں کو ہدایت دی ہے کہ سکندرآباد ریلوے اسٹیشن کی جدید کاری کے کام تیزی سے کئے جائیں تاکہ ان کاموں کو جلد مکمل کیاجائے۔ وزیر موصوف نے آج صبح سکندرآباد اسٹیشن کی جدید کاری کے کاموں کا معائنہ کیا۔
کشن ریڈی نے کہا کہ جدید سہولیات کے ساتھ ساتھ سڑک اور میٹرو ریل ٹرانسپورٹ کی سہولتوں سے اس کو جوڑنے کا بھی انتظام کیا جا رہا ہے۔ وزیرموصوف نے کہا کہ 715 کروڑ روپے کی لاگت سے اسٹیشن کی جدید کاری کے تین مرحلوں میں شروع کئے گئے کام تیزی سے جاری ہیں اور یہ کام 2025 تک مکمل ہوجائیں گے۔ وزیر اعظم نریندر مودی نے پچھلے سال ان کاموں کا سنگ بنیاد رکھا تھا۔
کشن ریڈی نے کہا کہ بیگم پیٹ ریلوے اسٹیشن کی جدید کاری کا کام جلد شروع کیا جائے گا۔ نامپلی ریلوے اسٹیشن کو بھی 380 کروڑ روپے کی لاگت سے جدید بنایا جا رہا ہے۔ انہوں نے کہا کہ اگر ریاستی حکومت یادادری تک ایم ایم ٹی ایس خدمات کی توسیع میں تعاون کرتی ہے تو اسے تیزی سے مکمل کیا جائے گا۔
مرکزی وزیر نے کہا کہ وزیر اعظم نریندر مودی اس ماہ کومرپلی ریلوے اسٹیشن کا سنگ بنیاد رکھیں گے اور چرلہ پلی ٹرمنل کو قوم کے نام کریں گے۔ وزیرموصوف نے کہا کہ ریاست میں طویل عرصہ سے نظر انداز کئے گئے ریلوے پروجیکٹوں پر مرکزی حکومت نے توجہ مرکوز کی ہے۔
