آرٹی سی عملہ کے ساتھ نامناسب سلوک اور توہین کے خلاف سجنارکا انتباہ

تلنگانہ آرٹی سی کے منیجنگ ڈائرکٹر وی سی سجنار نے آرٹی سی عملہ کے ساتھ نامناسب سلوک اور ان کی توہین کے خلاف انتباہ دیا ہے۔ سوشیل میڈیا کے اہم پلیٹ فارم ایکس پر سرگرم سجنار نے کہا کہ آرٹی سی عملہ غیر متزلزل عزم کے ساتھ اپنے فرائض انجام دیتے ہوئے لاکھوں مسافروں کو ہر روز محفوظ اور صحیح طریقے سے ان کی منزل تک پہنچاتاہے۔ عملے کی کوششوں سے ہی ادارہ برقرار ہے۔انہوں نے زوردیتے ہوئے کہاکہ خواتین کومفت سفر کی سہولت کیلئے ریاستی حکومت کی جانب سے متعارف کردہ مہالکشمی اسکیم کے نفاذ میں بھی یہ عملہ اہم کردار ادا کر رہاہے۔

وی سی سجنار نے کہا کہ ایسے میں آرٹی سی عملے کی توہین اور ان پر حملہ مناسب نہیں ہے۔ انتظامیہ ایسے واقعات کو برداشت نہیں کرے گا۔ ایسے واقعات کے ذمہ داروں کے خلاف قانونی کارروائی کی جائے گی۔ حکام نے پہلے ہی ان واقعات کے بارے میں مقامی پولیس اسٹیشنوں میں شکایت درج کرائی ہے۔ پولیس نے ایف آئی آر درج کرکے جانچ شروع کردی ہے۔

وی سی سجنار نے نے تمام سے درخواست کی ہے کہ سفر کے دوران عملے کے ساتھ تعاون کریں اور بحفاظت منزل تک پہنچیں۔ انہوں نے تمام سے تعاون کی درخواست کی تاکہ ایسے واقعات دوبارہ نہ ہوں۔