حیدرآباد میں کوویڈ کے کیسس میں اضافہ لیکن تشویش کی کوئی بات نہیں۔ سپرنٹنڈنٹ فیور ہاسپٹل

حیدرآباد ۔ کوروناکے بڑھتے معاملوں پر حکومت نے تمام اسپتالوں کو الرٹ کر دیا ہے۔ فیور ہاسپٹل کے سپرنٹنڈنٹ ڈاکٹر شنکر نے کہا ہے کہ شہر میں اس وقت کوویڈ کے کیسس میں بتدریج اضافہ دیکھاجارہا ہے۔ لیکن عوام کو تشویش میں مبتلا ہونے کی کوئی ضرورت نہیں ہے۔ انہوں نے عوام کو مرکزی اور ریاستی حکومتوں کی جانب سے جاری کردہ رہنمایانہ خطوط پر عمل آوری کا مشورہ دیا۔

ڈاکٹر شنکر نے کہا کہ بی پی اور گردوں کے عارضہ میں مبتلا افراد کے علاوہ حاملہ خواتین اور ایسے افراد جن میں امراض سے لڑنے کی طاقت کم ہے ان کے جے این ون کوویڈ وائرس سے متاثر ہونے کا امکان زیادہ ہے۔ انہوں نے مزید بتایا کہ کل فیور ہاسپٹل میں آؤٹ پیشنٹ کے طور پر رجوع ہونے والے چار افراد کی رپورٹ مثبت آئی ہے وہ جے این ون سے متاثر ہے یا نہیں اس کی تصدیق کے لیے رپورٹ گاندھی ہاسپٹل کو روانہ کی گئی ہے۔

فیور ہاسپٹل کے سپرنٹنڈنٹ نے مزید کہا کہ جے این ون اگر تیزی کے ساتھ پھیلتا ہے تو عثمانیہ، گاندھی، نیلوفر اور فیور ہاسپٹلس میں خصوصی بیڈس کی سہولت فراہم کرنے کی پہلے ہی حکومت نے ہدایت دی ہے اور اس سلسلے میں انتظامات بھی کیے گئے ہیں۔ ڈاکٹر شنکر نے تہواروں کے سیزن کے پیش نظر تمام افراد سے ماسک لگانے کی خواہش کی ہے۔