کانگریس کے جھوٹے پروپگنڈہ ،سے چوکس رہیں ، کے سی آر

چیف منسٹرتلنگانہ و صدر بی آر ایس چندرشیکھرراو نے کہا کہ کانگریس پارٹی نے ایک نیا جھوٹا پروپگنڈہ شروع کی ہے، کانگریس کے امیدوار بعض حلقوں میں بی آر ایس کیڈر اور عوام سے یہ کہہ رہے ہیں کہ انھیں ووٹ دے کر کامیاب بنائیں۔کیونکہ وہ جیتنے کے بعد ہی آرایس پارٹی میں ہی شامل ہونے والے ہیں چیف منسٹر نے کانگریس کے ایسے امیدواروں سے ہوشیار رہنے کا مشورہ دیا۔

منچریال میں بی آرایس پارٹی کے جلسہ عام سے خطاب کرتے ہوئے چیف منسٹر نے کہا کہ کانگریس پارٹی کامیابی کے لیے نئے نئے حربے اپنا رہی ہے۔ ایسے جھوٹے پروپیگنڈہ کرنے والے امیدواروں پر بھروسہ نہ کریں۔ انہوں نے کہا کہ کانگریس اقتدار میں آنےپر دھرانی پورٹل ختم کردیا جائے گا۔ اس سے کسانوں کو رعیتو بندھو اسکیم کے تحت مالی امداد حاصل کرنے میں مشکلات پیش آئے گی۔انہوں نے کہا کانگریس اقتدار میں آنے پر برقی کی سربراہی بھی نہیں ہوگی۔ پھر پیروی کا دور شروع ہو جائے گا۔جس میں لوٹ مار ہوگی۔

چیف منسٹر نے کہا کہ جمہوریت میں ووٹ عوام کو حاصل ایک ہتھیار ہے۔انہوں نے عوام سے کہا کہ آپ کا ووٹ آپ کے اپنے مستقبل کے ساتھ ساتھ ریاست کے مستقبل کا بھی فیصلہ کرے گا۔ ۔ کے سی آر نے کہا کہ بی آر ایس کا قیام ہی تلنگانہ کے لیے ہوا ہے اور پچھلے 10 سال کے دوران شفافیت کے ساتھ عوامی خدمات انجام دی گئی۔ اور آج تلنگانہ تمام شعبوں میں سر فہرست ہے۔ انہوں نے کہا کہ کانگریس نے 50 سال تک عوام کو دھوکہ دیا ہے اور کانگریس کے دور اقتدار میں عوام کی اور کسانوں کی کیا حالت تھی اس سے سبھی واقف ہیں۔ بی آر ایس سربراہ نے یہ بھی کہا کہ زبردستی تلنگانہ کو آندھراپردیش میں کانگریس نے ہی شامل کیا ہے۔ ۔ انہوں نے عوام سے منچریال میں بی آر ایس امیدوار و رکن اسمبلی این دیواکر راو کو کامیابی سے ہمکنار کرنے کی اپیل کی ہے۔