لوک سبھا انتخاب سے پہلے الیکشن کمشنر ارون گویل مستعفی، صدر جمہوریہ مرمو کی بھی ملی منظوری

ملک میں جانب لوک سبھا انتخاب کی تیاریاں زوروں پر ہیں، سبھی سیاسی پارٹیاں پوری طرح سرگرم دکھائی دے رہی ہیں اور جلد ہی انتخاب سے متعلق نوٹیفکیشن بھی جاری ہونے والا ہے، دوسری طرف الیکشن کمشنر ارون گویل نے اپنے عہدہ سے استعفیٰ دے دیا ہے۔ ان کے استعفیٰ کو صدر جمہوریہ دروپدی مرمو کی منظوری بھی مل گئی ہے۔

واضح رہے کہ الیکشن کمیشن میں ایک چیف الیکشن کمشنر اور دو الیکشن کمشنر کے عہدے ہوتے ہیں۔ چونکہ پہلے سے ہی الیکشن کمشنر کا ایک عہدہ خالی تھا، اس لیے ارون گویل کے استعفیٰ کے بعد دونوں الیکشن کمشنر کا عہدہ خالی ہو چکا ہے۔ ایسے میں ساری ذمہ داری چیف الیکشن کمشنر راجیو کمار کے کندھوں پر آ گئی ہے۔ آج سے انتخابی کمیشن میں الیکشن کمشنر کے دونوں عہدے خالی ہو گئے ہیں۔ ارون گویل کی مدت کار 2027 تک تھی، لیکن انھوں نے اس سے پہلے ہی استعفیٰ دے دیا اور اس کی وجہ فی الحال سامنے نہیں آئی ہے۔

بتایا گیا ہے کہ دو دن پہلے ہی الیکشن کمیشن کی ٹیم نے مغربی بنگال کا دورہ مکمل کیاتھا۔ اور تین دن بعد الیکشن کمیشن کی ٹیم جموں و کشمیر کا دورہ کرنے والی ہے۔ اس کے بعد لوک سبھا انتخاب کی تاریخ کا اعلان کیا جا سکتا ہے۔ لیکن اچانک ارون گویل کے استعفیٰ سے صورتحال تبدیل ہو چکی ہے۔