Imran Hussain 
راہگیرخاتون کو دل کا دورہ پڑنے پر پولیس عہدیدار نے اس کا فوری طور پر سی پی آرکرتے ہوئے اس کو ہوش میں لایااور اس کو اسپتال منتقل کیاگیا۔اس پولیس عہدیدار کے اس جذبہ کی تمام گوشوں سے ستائش کی جارہی ہے۔
تفصیلات کے مطابق یادادری بھونگیر ضلع کے ولی گنڈہ پولیس اسٹیشن کے حدود کے ولی گنڈہ مستقر میں سب انسپکٹر مہیندرلال گاڑیوں کا معائنہ کر رہے تھے۔اس دوران ایک خاتون جس کی شناخت وینکٹماں کے طورپر کی گئی ہے،وہاں سے گزررہی تھی کہ اچانک دل کا دورہ پڑنے سے وہ سڑک پر گرپڑی۔مہیندرلال فوراً موقع پر پہنچ گئے اور بغیر کسی تاخیر کے خاتون کا سی پی آر کیا جس کے بعد خاتون کو ہوش آیا۔
اسے بہتر علاج کے لیے فوری طور پر اسپتال لے جایا گیا۔ سی پی آر کے ذریعہ خاتون کی جان بچانے والے ایس آئی کو مقامی افرادکے ساتھ ساتھ پولیس حکام نے بھی مبارکباد دی۔ اس واقعہ کا ویڈیو سوشیل میڈیا کے مختلف پلیٹ فارمس پرتیزی کے ساتھ وائرل ہوگیا۔
