Imran Hussain 
تلنگانہ کے ضلع یادادری بھونگیر میں پولیس کی مدد سے ریونیو کے عہدیداروں نے ملاپورم میں واقع بی آرایس کے دفتر کو منہدم کردیا۔ ریونیو کے عہدیدارتقریبا 100ملازمین پولیس کے ساتھ کل رات دیرگئے پہنچے اوربلڈوزرکا استعمال کرتے ہوئے عمارت کو منہدم کردیا۔
بی آرایس یادگیرگٹہ کے منڈل صدرکے وینکٹیا نے اس کارروائی کی شدید مذمت کی۔ انھوں نے کہاکہ پارٹی منڈل دفتر کی تعمیر دو سال پہلے ملاپورم میں 150مربع گزپر ہوئی تھی۔ انہوں نے الزام لگایاکہ بغیرکسی نوٹس کے عمارت کو منہدم کیا گیا۔انھوں نے ریونیو ڈپارٹمنٹ کے عہدیداروں کی اس کارروائی کی مذمت کی۔
وینکٹیا نے الزام لگایا کہ ایڈیشنل کلکٹر ریونیو، حکمران جماعت کانگریس کے ایجنٹ کے طورپر کام کررہے ہیں۔انہوں نے شبہ ظاہر کیا کہ بی آرایس کے دفتر کو منہدم کرنے میں آلیر کے کانگریس رکن اسمبلی بی ایلیا کا رول ہے۔
