Imran Hussain 
آندھراپردیش میں کانگریس نے لوک سبھا کے ساتھ ہونے والے اسمبلی انتخابات کی تیاریوں کا آغازکردیا ہے۔وائی ایس آرتلنگانہ پارٹی کی صدروائی ایس شرمیلا کی کانگریس میں شمولیت کی اطلاعات کے ساتھ ہی اس تلگو ریاست کے سیاسی حلقوں میں بحث شروع ہوگئی ہے۔
وائی ایس شرمیلامتحدہ آندھراپردیش کے سابق وزیراعلی وائی ایس راج شیکھرریڈی کی دختر اوروائی ایس آرتلنگانہ پارٹی کی سربراہ ہیں۔ شرمیلا کو کانگریس ہائی کمان کی جانب سے دہلی طلب کئے جانے کی اطلاع ملی ہے۔ شرمیلا کے بھائی وائی ایس جگن موہن ریڈی فی الحال تلگو ریاست آندھراپردیش کے وزیراعلی اور وائی ایس آرکانگریس پارٹی کے صدر ہیں۔
بتایاجاتا ہے کہ کانگریس کے سینئر لیڈران شرمیلا سے اے پی کے انتخابات کے سلسلہ میں تبادلہ خیال کریں گے۔ شرمیلا کی پارٹی نے حال ہی میں منعقدہ تلنگانہ اسمبلی انتخابات سے کانگریس کی ایما پر انتخابات سے دوری اختیار کی تھی۔ سمجھاجاتا ہے کہ انہیں اے پی میں انتخابی مہم چلانے والی اہم شخصیات (اسٹارکمپینر) میں شامل کیاجائے گا۔ اےپی کانگریس کی ذمہ داری بھی دی جا سکتی ہے۔
اسی دوران اے پی کانگریس کے لیڈروں نے پارٹی کے اعلی رہنماوں سے آج دہلی ملاقات کی۔ اس میٹنگ میں انتخابی حکمت عملی پر تبادلہ خیال کیا۔ سال 2014میں متحدہ آندھراپردیش کی تقسیم کے ذریعہ تلنگانہ کی تشکیل کے بعد سے موجودہ آندھراپردیش اسمبلی میں کانگریس کا کوئی بھی رکن نہیں ہے۔ کانگریس اپنی عظمت رفتہ کے احیا کی تیاری کی جارہی ہے۔
