Imran Hussain 
آندھرا پردیش کے وجے واڑہ میں پنڈت نہرو بس اسٹینڈ پر پلیٹ فارم 12 پر انتظار کر رہے مسافروں پر ایک آر ٹی سی بس چڑھ گئی، جس میں ایک خاتون، ایک لڑکا اور کنڈکٹر سمیت تین افراد کی موت ہوگئی۔ کئی دیگر زخمی ہوئے۔
وجئے واڑہ کے آٹو نگر ڈپو سے سوپر لگژری بس گنٹور جارہی تھی کہ وہ اچانک پلیٹ فارم 12 پر چڑھ گئی، کنڈکٹر اور دو مسافروں کو کچل دیا۔ کئی اور لوگ بس کے نیچے پھنس گئے۔ عملے نے فوری جوابی کارروائی کی اور زخمیوں کو ہسپتال پہنچایا۔ پلیٹ فارم 11 اور 12 کی باڑ اور کرسیاں تباہ ہو گئیں۔مرنے والوں کی شناخت بس کنڈکٹر ویرایا، مسافر کماری اور اس کے پوتے آیان کے طور پر ہوئی ہے۔ کماری کی بہو سکنیا کی ٹانگ ٹوٹ گئی۔
آر ٹی سی کے ایم ڈی دوارکا تروملا راؤ نے جائے حادثہ کا دورہ کیا اور کہا کہ یہ ایک افسوس ناک واقعہ ہے۔ ان کا کہنا تھا کہ بس کی حالت ٹھیک ہے اور ابھی تک یہ واضح نہیں ہے کہ حادثہ انسانی غلطی یا فنی خرابی کے باعث پیش آیا۔ انہوں نے کہا کہ حادثے کو سنجیدگی سے لیا جا رہا ہے اور 24 گھنٹے میں تحقیقات مکمل کر لی جائیں گی۔ انہوں نے مزید کہا کہ ذمہ داروں کے خلاف کارروائی کی جائے گی۔
تروملا راؤ نے یہ بھی کہا کہ ڈرائیور کی عمر 61 سال ہے اور حال ہی میں بیماری سے صحت یاب ہو کر ڈیوٹی پر واپس آیا ہے۔ انہوں نے مرنے والوں کے لواحقین کو 5 لاکھ روپے کی ایکس گریشیا ادائیگی کا اعلان کیا۔
