Imran Hussain 
تلنگانہ کی کانگریس حکومت بجٹ کی تیاری کے اقدامات کررہی ہے۔ تقریبا دس سال کے بعد اس تلگو ریاست میں برسراقتدارآئی کانگریس کے پہلے بجٹ سے تمام کو کئی توقعات ہیں۔ذرائع کے مطابق فائنانس ڈپارٹمنٹ کی جانب سے جلد ہی اس خصوص میں ٹیکس تجاویز پر خصوصی اجلاس منعقد کیاجائے گا۔
ریونت ریڈی حکومت کی ترجیحات کے مطابق ضمانتوں اور انتخابی وعدوں پر عمل درآمد کو ترجیح دی جائے گی۔ساتھ ہی ملازمتوں کو پُرکرنے پر توجہ مرکوز کی جائے گی۔محکمہ فائنانس نے آئندہ مالی سال کے لئے تمام محکموں سے تجاویز طلب کی ہیں اور حکومت کی ترجیحات کے مطابق متعلقہ محکموں نے تجاویز بھیج دی ہیں۔
ریونت ریڈی حکومت نے پہلے ہی دو ضمانتوں پر کامیابی کے ساتھ عمل شروع کردیا ہے۔ بقیہ پر 100 دنوں کے اندر عمل درآمد ہو جائے گا۔حکومت مزید دو ضمانتوں پر جاریہ ماہ کے اواخر تک عمل کرنے کا منصوبہ رکھتی ہے۔
6ضمانتوں کے سلسلہ میں ریاست بھر میں بڑی تعداد میں درخواستیں موصول ہوئی ہیں۔ ان درخواستوں کی ڈاٹاانٹری کا کام ختم ہونے کے بعد ان کے نفاذ کے لئے رہنما خطوط کو حتمی شکل دی جائے گی۔اندرون ایک سال میگا ڈی ایس سی کے انعقاد کے لیے حکومت کی ہدایت کے مطابق تجویز کی تیاری کا کام کیاجائے گا جس میں دو لاکھ سرکاری ملازمتیں فراہم کی جائیں گی۔
چونکہ مرکز کی جانب سے اس سال علی الحساب بجٹ پیش کرنے کی اطلاع ہے، اس لیے ریاست کو آنے والے فنڈز کو مدنظر رکھتے ہوئے ریاستی حکومت بجٹ تجاویز کو حتمی شکل دے گی ۔عہدیداروں کا کہنا ہے کہ یہ تجاویز وزیر اعلیٰ کی ہدایت کے مطابق تیار کی گئی ہیں تاکہ اس بات کو یقینی بنایا جا سکے کہ غیر ضروری اخراجات نہ ہوں۔
