Imran Hussain 
تلنگانہ وزیراعلیٰ کا حکام کے ساتھ جائزہ اجلاس
حیدرآباد: تلنگانہ کے چیف منسٹر اے ریونت ریڈی نے عہدیداروں کو ہدایت دی کہ وہ موسی کیچمنٹ ایریا میں مقیم مستحق غریبوں اور حیدرآباد میں جھیلوں اور تالابوں کے ارد گرد تجاوزات کی وجہ سے بے گھر ہونے والوں کی تفصیلات جمع کریں۔ انہوں نے عہدیداروں کو ہدایت دی کہ وہ بے گھر خاندانوں کو ڈبل بیڈ روم والے مکانات یا دیگر مناسب متبادلات الاٹ کرکے بازآبادکاری فراہم کریں۔
موسی ریور فرنٹ ڈیولپمنٹ اور حیدرآباد میٹرو ریل پروجیکٹس پر ایک جائزہ میٹنگ میں ریونت ریڈی نے قدرتی آفات سے بچنے کے لیے اوٹر رنگ روڈ کے اندر آبی ذخائر کو محفوظ کرنے کی ضرورت پر زور دیا۔ انہوں نے حیدرآباد میں تمام جھیلوں اور تالابوں پر سی سی ٹی وی کیمروں کی تنصیب کا حکم دیا، انہیں کمانڈ کنٹرول سینٹر سے جوڑ کر مزید تجاوزات پر قابو پایا جا سکے۔
چیف منسٹر نے آبی ذخائر کے ارد گرد فل ٹینک لیولز (FTL) اور بفر زونز کی نشاندہی کرنے اور ان کو نشان زد کرنے پر بھی زور دیا اور حکام سے ان زونز کے بارے میں تفصیلی رپورٹ پیش کرنے کو کہا۔ انہوں نے زور دے کر کہا کہ ریاستی حکومت اس طرح کی تجاوزات سے متاثرہ غریبوں کے تحفظ کے لیے ضروری اقدامات کرے گی۔
میٹنگ کے دوران چیف منسٹر نے حیدرآباد میٹرو ریل کی پیشرفت کا جائزہ لیا، خاص طور پر اولڈ سٹی کی توسیع پر اور ہوائی اڈے سے فیوچر سٹی تک میٹرو کنیکٹیویٹی کی تجویز پیش کی۔ افسران سے کہا گیا کہ وہ میٹرو پراجیکٹس کے لیے اراضی کے حصول میں تیزی لائیں اور متعلقہ چیلنجوں کو حل کریں۔ ایل بی نگر سے حیات نگر اور ایم جی بی ایس سے چندرین گٹہ تک میٹرو کی توسیع پر ایک جامع تفصیلی پروجیکٹ رپورٹ (ڈی پی آر) دسہرہ سے قبل مرکز کو پیش کرنے کی درخواست کی گئی ۔
میٹنگ میں پرنسپل سکریٹری برائے میونسپل ایڈمنسٹریشن دانا کشور، میٹرو ریل کے، ایم ڈی ، این وی ایس ریڈی، جی ایچ ایم سی کمشنر امرپالی، ایچ ایم ڈی اے کمشنر سرفراز احمد، اور دیگر سینئر افسران نے شرکت کی۔
