دہلی میں تبدیلی کیلئے پارلیمانی انتخابات میں بھی کانگریس کی حمایت کرناچاہتاہوں:پروفیسر کوڈنڈارام

تلنگانہ جناسمیتی کے سربراہ پروفیسر کودنڈارام نے گورنر کوٹہ کے تحت انہیں رکن قانون ساز کونسل مقرر کرنے پرمسرت کا اظہار کیا۔ پروفیسر کودنڈارام نے حالیہ تلنگانہ اسمبلی انتخابات میں اپنی پارٹی کے امیدوارنہ ٹہراتے ہوئے کانگریس کی حمایت کی تھی انھوں نے ایک تلگو نیوزچینل سے بات کرتے ہوئے کہا کہ انہوں نے ایم ایل سی کے ذریعہ عوام کی خدمت کا راستہ تلاش کیا ہے۔ اس موقع کو فراہم کرنے پر انہوں نے گورنر اور وزیراعلی ریونت ریڈی سے خصوصی طورپر اظہارتشکر کیا۔

پروفیسر کودنڈارام نے کہاکہ اتحادی کی حیثیت سے تعاون کرتے ہوئے عوامی مسائل پر حکومت کو توجہ دلائی جائے گی۔ انہوں نے کہا کہ وہ پارلیمنٹ کے انتخابات میں بھی کانگریس کی حمایت کرناچاہتے ہیں۔ دہلی میں تبدیلی ان کی خواہش رہی ہے۔اس تبدیلی کیلئے مساعی کی ضرورت ہے۔اسی لئے وہ کانگریس کی حمایت کرنا چاہتے ہیں۔

تلنگانہ جنا سمیتی کے صدر نے کہاکہ انہیں کونسل کا رکن ہونے کے ناطے کئی چیزیں سیکھنے کو ملیں گی۔انہوں نے کہاکہ یہ موقع ان کیلئے فائدہ مند ثابت ہوسکے گا۔اس سوال پر کہ ان کو وزیرتعلیم بنایاجائے گا توکوڈنڈارام نے کہاکہ وہ اس بارے میں کوئی جانکاری نہیں رکھتے۔انہیں سرکاری طورپر کوئی اطلاع اس خصوص میں نہیں ملی ہے۔انہوں نے کہاکہ تلنگانہ کی ترقی کے سلسلہ میں ایوان میں اظہارخیال کریں گے۔