تلنگانہ میں رات کے درجہ حرارت میں گراوٹ۔شمالی اضلاع میں درجہ حرارت9ڈگری درج

شمالی ہند سے آرہی سرد ہواؤ ں کے نتیجہ میں تلنگانہ میں رات کے درجہ حرارت میں گراوٹ آئی ہے۔ اور سردی کی شدت میں اضافہ ہوا ہے۔ محکمہ موسمیات حیدرآباد نے کہا ہے کہ یہ صورتحال مزید دو دن تک جاری رہے گی۔

محکمہ موسمیات نے کہا کہ شمالی تلنگانہ کے اضلاع میں سردی کی شدت زیادہ ہے۔ گذشتہ ایک ہفتہ کے دوران شمالی تلنگانہ کے اضلاع میں درجہ حرارت 9ڈگری سلسیس تک درج کیا گیا۔ریاستی دارالحکومت حیدرآباد اور اس کے نواحی علاقوں میں درجہ حرارت 10ڈگری سلسیس درج کیا گیا۔ گذشتہ 24گھنٹوں کے دوران شمالی تلنگانہ بالخصوص عادل آباد میں درجہ حرارت 11.5ڈگری سلسیس درج کیاگیا۔

وسطی تلنگانہ کے اضلاع میں درجہ حرارت 13تا14ڈگری سلسیس درج کیاگیا۔ یکم جنوری سے سردی کی شدت میں مزید اضافہ کاامکان ہے۔ آئندہ دو دنوں کے دوران شمالی تلنگانہ کے کئی اضلاع بشمول عادل آباد، آصف آباد، منچریال اور نظام آباد میں سردی کی شدت کا امکان ہے جہاں درجہ حرارت کے 10ڈگڑی درج ہوگا۔ بھدرادری کوتہ گوڑم، کھمم، نلگنڈہ اورسوریاپیٹ کے کئی علاقوں میں درجہ حرارت میں تبدیلی کا امکان ہے۔ رات میں دو بجے سے صبح 9بجے تک شدید کہر کی لہر کا بھی امکان ہے۔