حیدرآباد میں کانگریس کی سیاسی امور کمیٹی کا اجلاس

حکمران جماعت کانگریس کی سیاسی امور کمیٹی کا اجلاس پیر کو ہوگا۔ کانگریس کے ریاستی ہیڈکوارٹرس گاندھی بھون میں ہونے والے اجلاس میں مختلف امور کے ساتھ ساتھ نامزد عہدوں کو پُرکرنے کے بارے میں بھی تفصیلی طورپر تبادلہ خیال کیا جا سکتا ہے۔

ریاست میں کانگریس کے برسراقتدارآنے کے بعد پہلی مرتبہ اس کمیٹی کا اجلاس ہورہا ہے۔اس اجلاس میں تلنگانہ کانگریس کے سربراہ و وزیراعلی ریونت ریڈی کے بشمول وزرا اور پارٹی کے اہم لیڈران شرکت کریں گے۔ سمجھاجاتا ہے کہ اس اجلاس میں ریاست میں کانگریس کو برسراقتدارلانے پر ریاست کے عوام سے اظہارتشکر کرنے کیلئے ایک قرارداد بھی منظور کی جائے گی۔

تلنگانہ میں کانگریس پہلی بار اقتدارمیں آئی ہے۔ پارٹی اور حکومت کو چلانے کے سلسلہ میں مختلف امور پر غور کیا جائےگا۔ پی سی سی کے کارگزارصدرمہیش کمارگوڑنے میڈیا کو بتایا کہ کمیٹی کانگریس کا فیصلہ ساز ادارہ ہے۔ انہوں نے کہاکہ ریاست کے عوام سے اظہارتشکر کے بشمول 6ضمانتوں پر کس طرح عمل کیاجائے اور کامیابی کے ساتھ عوام تک ان کو پہنچایاجائے، اس پر بھی تبادلہ خیال کیاجائے گا۔

مہیش کمارگوڑ نے کہاکہ ریاست کے مخلوعہ نامزد عہدوں کو پُرکیاجائے گا، اس میں کوئی جلد بازی نہیں ہے۔اے آئی سی سی انچارج مانک راو ٹھاکرے اس اجلاس کی صدارت کریں گے۔اجلاس میں اے آئی سی سی سکریڑیز کے بشمول ریاستی کانگریس کے لیڈران شرکت کریں گے۔