Imran Hussain 
ضلع وقارآباد کی تانڈور پولیس نے ایک سیریل کلر کو گرفتار کر لیا جو سات خواتین کے قتل کی وارداتوں میں ملوث بتایا گیا ہے۔ پولیس کے مطابق 29 نومبر کو تانڈور سے تعلق رکھنے والی سرور بی نامی خاتون کام کی تلاش میں گھر سے نکلی تھی اور واپس نہیں لوٹی۔ اس سلسلے میں تانڈور پولیس اسٹیشن میں گمشدگی کی شکایت درج کروائی گئی تھی۔
پولیس نے سی سی ٹی وی فوٹیج کا جائزہ لیا تو آخری مرتبہ خاتون ایک شخص کے ساتھ نظر آئی۔ اس شخص کی شناخت کشٹیا کے طور پر کر لی گئی اس کا تعلق دھارور منڈل کے عالم پور سے بتایا گیا ہے۔ پولیس نے جب اسے حراست میں لے کر پوچھ تاچھ کی تو معلوم ہوا کہ اس نے سرور بی کو کام دلانے کے بہانے لے جا کر ان کا ساڑی کی مدد سے گلا گھونٹ کر قتل کر دیا اور خاتون کے پاس موجود ایک ہزار روپے اور زیور لے کر فرار ہو گیا۔
تحقیقات کے دوران معلوم ہوا کہ کشٹیا نے اسی طرح اور بھی چھ خواتین کا معمولی رقم کے لیے قتل کیا اور وہ تمام مزدور پیشہ بتائی گئی ہیں۔
