حیدرآباد میں ٹریفک مسائل پر وزیراعلیٰ ریونت ریڈی کا حکام کے ساتھ جائزہ اجلاس

تلنگانہ کے چیف منسٹراے ریونت ریڈی نے ریاستی سکریٹریٹ میں گریٹر حیدرآباد میں ٹریفک مسائل پولیس ، جی ایچ ایم سی اور دیگر محکموں کے عہدیداروں کے ساتھ اجلاس منعقد کیا۔ انھوں نے کہا گریٹر حیدرآباد میں ٹریفک کنٹرول پر محکمہ پولیس کواولین ترجیح دی جانی چاہئے۔

سی ایم، نے محکمہ ٹریفک میں ٹریفک اہلکاروں کی کمی پر قابو پانے کے لیے فوری طور پر مناسب تعداد میں ہوم گارڈز کی بھرتی عمل میں لانے اور ان تمام امور کو اندرون تین ماہ مکمل کرنے کی ہدایت دی۔ٹریفک مسائل پر قابو پانے کے لئے لاء اینڈ آرڈر پولیس کی خدمات سے بھی استفادہ کیا جانا چاہیے۔موجودہ ٹرافک اسٹیشنس کو اپ گریڈ کرنے اور عملہ کی فراہمی کو یقینی بناتے ہوئے پولیس اسٹیشنس کی تنظیم نو کرنے کی ہدایت دی۔

ریونت ریڈی نے شہر میں سڑکوں اور جنکشنس کی توسیع پر توجہ دینے‘ ایل بی نگر جنکشن کے خطوط پر سب وے، انڈر پاس اور سرفیس وئے کی تعمیر کے امکانات کا جائزہ لینے کی تجویز پیش کی۔چیف منسٹر نے حیدرآباد، سائبرآباد اور رچہ کنڈہ کمشنریٹ کے پولیس افسران اور میونسپل زونل کمشنروں کو تال میل کے ساتھ ٹرافک کنٹرول پر توجہ مرکوز کرنے کا مشورہ دیا۔

ٹریفک کے مسائل اور ان پر قابو پانے کے لئے مہینے میں ایک بار اجلاس منعقد کرنے کی ہدایت دی۔ شہر میں پارکنگ مسئلے پر قابو پانے کے لیے ملٹی لیول کار پارکنگ سنٹرس کی تعمیر کی حوصلہ افزائی کرنے اور اس سلسلہ میں خصوصی پارکنگ پالیسی تدوین کرنے کا مشورہ دیا۔انھوں نے کہاکہ عظیم تر حیدرآباد میں ٹریفک کنٹرول اور نظم و نسق کے لیے ایک جامع منصوبہ تیار کرنے کی ضرورت ہے اور کنسلٹیز کو ذمہ داریاں دیتے ہوئے رپورٹ تیار کرنے کی ہدایت دی۔