ضلع میدک میں جادو کرنے کے الزام میں خاتون کو زندہ جلا دیا گیا۔

میدک: میدک ضلع کے رامیام پیٹ میں جادو کرنے کے الزام میں گاؤں والوں نے ایک خاتون کو زندہ جلا دیا۔ یہ واقعہ جمعرات کی رات کٹریال گاؤں میں پیش آیا جب گاؤں والوں نے ایک مقامی باشندہ دیاگالا متوّا پر اس وقت حملہ کیا جب وہ اپنے گھر پر تھیں۔ اطلاعات کے مطابق گاؤں والوں نے متوّا پر جادو ٹونے کا الزام لگایا۔ انہوں نے اس پر پٹرول چھڑک کر اسے آگ لگا دی۔ اس کی چیخیں سن کر کچھ مقامی لوگ اس کی مدد کے لیے پہنچ گئے اور اسے بچانے کی کوشش کی۔

اطلاع ملنے پر پولیس موقع پر پہنچی اور شدید زخمی خاتون کو فوری طور پر اسپتال منتقل کیا۔ متوّا کو بہتر علاج کے لیے حیدرآباد کے اسپتال لے جایا جا رہا تھا لیکن راستے میں ہی وہ زخموں کی تاب نہ لاتے ہوئے چل بسی۔ اس کی موت کے بعد، پولیس اس کی لاش کو مزید رسمی کارروائیوں کے لیے رامیام پیٹ اسپتال لے گئی۔ یہ بھی بتایا گیا کہ خوف کے مارے متاثرہ کا بیٹا اور بہو حملے کے بعد گاؤں سے فرار ہو گئے۔

پولیس نے واقعہ کے سلسلے میں مقدمہ درج کرکے تین افراد کو حراست میں لے لیا ہے۔ پولیس نے مکمل تحقیقات اور جرم میں ملوث افراد کے خلاف سخت کارروائی کی یقین دہانی کرائی ہے۔