رام مندر کے افتتاح پر تلنگانہ کے مختلف مقامات میں شرانگیزی,مساجد کے سامنے دل آزار نعرے، سنگا ریڈی میں تشدد

تلنگانہ کے مختلف علاقوں میں رام مندر کے افتتاحی تقریب کے موقع پر نکالی گئی شوبھا یاترا کے دوران چند ایک مقامات پر کشیدگی دیکھی گئی۔ شرپسندوں نے یاترا کے دوران مساجد کے سامنے دل آزار نعرے لگائے اور حالات کو خراب کرنے کی کوشش کی۔ تاہم مقامی مسلمانوں کے صبر اور پولیس کی مداخلت کے بعد حالات پرامن ہوگئے۔

ضلع نارائن پیٹ کے کوسگی ٹاون میں زعفرانی تنظیموں کی جانب سے نکالی گئی ہاترا کے دوران کوسگی کی مدینہ مسجد کے سامنے شرپسندوں نے کافی دیر تک ڈی جے اور لاوڈ اسپیکر سے دل آزار گانے لگائے اور مسلمانوں کو مشتعل کرنے کی کوشش کی۔ لیکن مسجد کے ذمہ داروں نے مصلیوں اور مقامی مسلمانوں سے صبر کا مظاہرہ کرنے کی اپیل کی جس سے حالات پرامن ہوگئے۔

اسی طرح کا ایک اور واقعہ نلگنڈہ ضلع کے نارکٹ پلی کی مسجد کی کھلی زمین پر پیش آیا۔ بتایا جاتا ہے کی اتوار کی شب عشاء کے وقت چند شرپسند ہندو تنظیموں کے کارکنوں نے مسجد سرائے میر عالم نارکٹ پلی ضلع نلگنڈہ کے باب داخلہ پر واقع مسجد کی وقف اراضی پر جمع ہوئے جئے سری رام کے نعرے لگاتے ہوئے پر امن فضاء کو مکدر کرنے کی کوشش کی ۔

اسوقت کئ مسلمان نماز عشاء کے لئے مسجد میں موجود تھے ایسے میں باہر بھیڑ اور نعرے بازی اس باوجود مسلمانوں نے صبر کا مظاہرہ کیا اور بذریعہ فون اور واٹس ایپ کے ذریعے باہر کے مناظر کو وائرل کیا۔

اطلاع ملتے ہی صدر مجلس اتحادالمسلمین نلگنڈہ محمد رضی الدین ایڈوکیٹ نے فوری ضلع ایس پی نلگنڈہ سریمتی چندنا دیپتی’ڈی ایس پی سریدھر ریڈی ‘اور متعلقہ سرکل انسپکٹر سے بذریعہ فون ربط پیدا کرتے ہوئے برہمی کا اظہار کیا اور فوری مصلیوں کی حفاظت کرنے اور شرپسندوں کو وہاں سے ہٹانے کا مطالبہ کیا۔

ان کے مطالبہ پر پولیس فوری حرکت میں آتے ہوئے ہندو فرقہ پرست تنظیموں کے کارکنوں کو وہاں سے جانے پر مجبور کردیا اور مصلیوں کو بحفاظت اپنے اپنے مکانات کو پہنچادیا ۔