Imran Hussain 
حیدرآباد: سابق وزیر ٹی ہریش راؤ نے گوداوری پشکارالو فیسٹیول کے لئے آندھرا پردیش کو 100 کروڑ روپئے مختص کرنے اور تلنگانہ کو بغیر کسی فنڈ کے چھوڑ دینے پر مرکزی حکومت کے فیصلے پر سخت ناراضگی کا اظہار کیا ہے۔ انہوں نے بی جے پی اور کانگریس دونوں کو تنقید کا نشانہ بنایا کہ وہ ریاست میں نمایاں نمائندگی کے باوجود تلنگانہ کے لیے کوئی مالی تعاون حاصل کرنے میں ناکام رہے ہیں۔
ہریش راؤ نے نشاندہی کی کہ تلنگانہ میں بی جے پی کے آٹھ ارکان پارلیمنٹ اور دو مرکزی وزیر ہیں، اس کے باوجود ریاست کو مرکز سے ایک روپیہ بھی نہیں ملا۔ اس کے برعکس، آندھرا پردیش کو خصوصی فنڈز کے تحت 15,000 کروڑ روپے دیئے گئے، جب کہ تلنگانہ کو کچھ نہیں ملا۔
ایک ٹویٹ میں ہریش راؤ نے کہا کہ اگر بھارت راشٹرا سمیتی کی لوک سبھا میں مضبوط موجودگی ہوتی تو ایسی ناانصافی کو کبھی برداشت نہیں کیا جاتا۔ انہوں نے زور دے کر کہا کہ مرکز کی طرف سے تلنگانہ کو نظر انداز کرنا، خاص طور پر اہم فنڈنگ کے معاملات میں، ناقابل قبول ہے۔
