Imran Hussain 
آندھراپردیش کانگریس کے سابق سربراہ این رگھوویراریڈی نے وائی ایس شرمیلا کو ریاستی کانگریس کی سربراہ بنائے جانے کو بہتر قدم قراردیتے ہوئے کہاکہ یہ پارٹی کیلئے اچھا قدم ہے۔ انہوں نے ایک تلگونیوزچینل سے بات کرتے ہوئے کہا کہ کانگریس ریاست میں مستحکم ہورہی ہے۔انہوں نے کہاکہ کئی لیڈران کانگریس سے رابطہ میں ہیں۔
واضح رہے کہ شرمیلا کو ریاست آندھراپردیش میں پارٹی کا سربراہ مقرر کرنے کے بعد پارٹی کیڈرمیں جوش وخروش دیکھاجارہا ہے۔ سال 2014میں متحدہ آندھراپردیش کی تقسیم کے ذریعہ تلنگانہ کی تشکیل کے بعد سے اے پی میں کانگریس اپنے بقا کے لئے جدوجہد کر رہی ہے۔
تاہم تقریبا دس سال بعد تلنگانہ میں کانگریس کے برسراقتدارآنے کے بعد اورپھر متحدہ آندھراپردیش کے سابق وزیراعلی راج شیکھرریڈی کی دختر کو اے پی کانگریس کی ذمہ داری دیئے جانے کے بعد ایک اور تلگو ریاست آندھراپردیش میں کانگریس اقتدار کے امکانات میں اضافہ ہوگیا ہے۔
