حیدرآباد: میلاد النبیؐ جلوس کے دوران شہرمیں ٹریفک تحدیدات

حیدرآباد: حیدرآباد بھر میں جمعرات کو میلاد النبی ﷺ کے موقع پر متعدد جلوس نکالے جائیں گے۔ جلوسوں کے پیش نظر حیدرآباد سٹی پولیس نے صبح 8 بجے سے شام 8 بجے تک ٹریفک پر پابندیاں عائد کردی ہیں۔ متاثر ہونے والے اہم راستوں میں فلک نما سے وولٹا ہوٹل، یحییٰ پاشا درگاہ تا وولٹا ہوٹل، مکہ مسجد سے حج ہاؤس اور پتھر گٹی سے عالیجہ کوٹلہ تک کے علاقے شامل ہیں۔

جلوس کی ابتدا فلک نما میں سید قادری چمن سے شروع ہوگی، جو علی آباد ایکس روڈس، لال دروازہ ایکس روڈس، چارمینار، گلزار حوض ، مدینہ بلڈنگ، نیا پل برج، سالارجنگ میوزیم اور پرانی حویلی جیسے اہم مقامات سے گزرے گا۔ بی بی بازار اور اعتبار چوک پر اختتام پذیر ہو گا۔ ان راستوں کی وجہ سے ٹریفک کو محبوب نگر ایکس روڈ، کنڈیکل گیٹ، پھسل بنڈہ اور کرنول روڈ کی طرف موڑ دیا جائے گا۔

میلاد کمیٹی کے زیر اہتمام مرکزی میلاد جلوس مکہ مسجد سے ظہر کی نماز کے بعد شروع ہوگا۔ یہ وولٹا ہوٹل میں اختتام پذیر ہونے سے پہلے چارمینار، گلزار حوض، پتھرگٹی، نیاپل، سالار جنگ میوزیم اور دیگر اہم مقامات کا احاطہ کرے گا۔ پولیس نے مسافروں کو مشورہ دیا ہے کہ وہ متاثرہ راستوں سے گریز کریں اور 9010203626 پر رابطہ کرکے ٹریفک کی مشکلات کی اطلاع دیں۔