Imran Hussain 
حیدرآباد: آئی اے ایس افسران کو تلنگانہ ہائی کورٹ میں دھچکا لگا کیونکہ عدالت نےڈپارٹمنٹ آف پرسنل اینڈ ٹریننگ (ڈی او پی ٹی) کے احکامات پر روک لگانے کی ان کی درخواستوں کو خارج کردیا گیا تھا۔ ہائی کورٹ نے فیصلہ دیا کہ جن افسران کو آندھرا پردیش کیڈر میں الاٹ کیا گیا ہے، انہیں فوری طور پر اپنی نئی تعیناتیوں پر رپورٹ کرنا ہوگا۔ عدالت نے سنٹرل ایڈمنسٹریٹو ٹریبونل (سی اے ٹی) کے سابقہ احکامات کو برقرار رکھا۔
آئی اے ایس افسران، بشمول وکاتی کرونا، وانی پرساد، رونالڈ روز، امرپالی، سروجنا، شیواشنکر، اور ہری کرن، نے ڈی او پی ٹی کی ہدایات کو چیلنج کرتے ہوئے ہاؤس موشن عرضیاں داخل کی تھیں۔ عدالت نے فریقین کے دلائل سننے کے بعد درخواستیں خارج کر دیا۔
آئی اے ایس افسران کے قانونی نمائندوں نے دلیل دی کہ مرکزی حکومت نے کیڈر الاٹمنٹ کے لیے دس سال کے تجربے پر غور کرنے سے متعلق ہائی کورٹ کے سابقہ احکامات کو نظر انداز کیا تھا۔ انہوں نے یہ بھی دعویٰ کیا کہ مرکز نے ان کی درخواستوں میں پہلے کی ہدایات پر غور نہیں کیا تھا۔
افسران نے درخواست کی کہ سی اے ٹی سے حتمی فیصلہ آنے تک ان کی تعیناتی 4 نومبر تک موخر کر دی جائے،۔ آندھرا پردیش اور تلنگانہ دونوں حکومتوں نے ہائی کورٹ کو خط روانہ کرتے ہوئے افسران کی تعیناتی میں 15 دن کی تاخیر کرنے کی درخواست کی حمایت کی تھی۔ تاہم عدالت نے ان دلائل کو قبول نہیں کیا۔
مرکز کی نمائندگی کرتے ہوئے، ایڈیشنل سالیسٹر جنرل نرسمہا شرما نے دلیل دی کہ عدالتوں کو یہ فیصلہ نہیں کرنا چاہیے کہ ملازمین کہاں تعینات ہیں، اور سی اے ٹی کی طرف سے اسٹے نہ دینے کا فیصلہ مناسب تھا۔ انہوں نے درخواستوں کو خارج کرنے کی درخواست کی اور عدالت کو یقین دلایا کہ ڈی او پی ٹی کے فیصلے کے خلاف سی اے ٹی میں مقدمہ دائر کیا جائے گا۔
مرکزی حکومت کے دلائل کو مدنظر رکھتے ہوئے عدالت نے آئی اے ایس افسران کی 15 دن کی توسیع کی درخواست کو مسترد کر دیا۔ عدالت نے افسران کو ہدایت دی کہ وہ فوری طور پر اپنی آندھرا پردیش پوسٹنگ پر رپورٹ کریں، اس بات کی نشاندہی کرتے ہوئے کہ مزید مسائل کو بعد میں حل کیا جا سکتا ہے۔ عدالت نے اس بات پر زور دیا کہ اس طرح کے معاملات میں بار بار مداخلت سے انتظامی عمل مزید پیچیدہ ہو سکتا ہے۔
