تلنگانہ:حکومت کریم نگر آگ متاثرین کی ممکنہ مدد کرے گی:وزیرٹرانسپورٹ پونم پربھاکر

تلنگانہ کے وزیر ٹرانسپورٹ پونم پربھاکر نے یقین دلایا ہے کہ حکومت کریم نگر کے آگ متاثرہ خاندانوں کو ہر ممکن مدد فراہم کرے گی۔ جنہوں نے آتشزدگی کے واقعہ میں اپنا سب کچھ کھو دیا ہے۔

کریم نگر کے آدرش نگر میں منگل کو لگ بھگ 21 پوری جھونپڑیوں کو آگ لگ گئی تھی۔ وزیرموصوف نے آج صبح جائے حادثہ کا معائنہ کیا۔ اس موقع پر متاثرین سے انہوں نے بات چیت کی اوراس واقعہ کے نقصانات کی تفصیلات حاصل کیں۔ حکام کو ہدایت کی گئی کہ وہ متاثرین کی ہر ممکن مدد کریں تاکہ انہیں کسی قسم کی مشکلات کا سامنا نہ کرنا پڑے۔

اس موقع پر خطاب کرتے ہوئے وزیر موصوف نے کہا کہ تمام متاثرین غریب تھے جو روزانہ اجرت کا کام کرتے تھے۔ انہوں نے کہا کہ یہ بدقسمتی کی بات ہے کہ اس واقعہ میں کپڑے، ضروری اشیاء اور سرٹیفکیٹ جل گئے۔ان افراد کے لیے عارضی رہائش اور کھانے کا انتظام کیا گیا ہے۔ انہوں نے کہا کہ حکومت کے ساتھ کانگریس انہیں سامان بھی فراہم کرے گی۔

ریاستی وزیر نے کہا کہ چند روز میں انہیں مستقل رہائش فراہم کر دی جائے گی۔ انہوں نے کہا کہ ضلع انتظامیہ کے ساتھ کلکٹر کو ہدایت دی گئی کہ متاثرین کو کوئی پریشانی نہ ہو۔ انہوں نے کہا کہ عوامی حکمرانی کے تحت حلقے میں 3500 سے 4000 مکانات بنانے کے لیے اقدامات کیے جا رہے ہیں۔ انہوں نے کہا کہ آگ متاثرین کے لیے پہلی ترجیح یہ مکانات ہوں گے۔