Imran Hussain 
بلقیس بانو کیس کے مجرموں کی خود سپرد ہونے کے لیے مہلت کی درخواست کوسپریم کورٹ نے مسترد کر دیا۔ عدالت نے 21 جنوری اتوار تک انھیں خود سپرد ہونے کی ہدایت دی ہے۔
واضح رہے کہ سال 2002 میں گودھرا واقع کے بعد گجرات میں ہوئے فسادات میں بلقیس بانو کے ارکان خاندان کا قتل کر دیا گیا تھا اور پانچ ماہ کی حاملہ بلقیس بانو کی اجتماعی عصمت ریزی کی گئی تھی۔
اس واقع کے ذمہ داروں میں سے 11 مجرموں نے 15 سال جیل میں گزارے جس کے بعد سال 2022 میں گجرات حکومت نے ان کی سزا معاف کر دی تھی جس کے بعد 15 اگست کو وہ جیل سے رہا ہوئے۔
ریاستی حکومت کے فیصلہ کو چیلنج کرتے ہوئے سپریم کورٹ میں داخل کی گئی درخواستوں پر عدالت نے 8 جنوری کو فیصلہ سناتے ہوئے ان تمام کی سزا کو کالعدم قرار دیتے ہوئے انہیں جیل بھیج دینے کی ہدایت دی تھی۔
تین قصورواروں نے سپریم کورٹ میں خود سپردگی کے لئے کچھ وقت طلب کیا تھا تاہم عدالت نے انہیں مہلت دینے سے انکار کر دیا۔ اور 21 جنوری کو جیل جانے کی ہدایت دی ہے۔
