Imran Hussain 
جنوب مغربی خلیج بنگال پر بنے سمندری طوفان میچنگ کے زیر اثر آندھراپردیش کے کئی اضلاع میں بارش ہو رہی ہے۔ وشاکھا پٹنم ، مشرقی گوداوری،مغربی گوداوری اضلاع، با پٹلہ، تروپتی ، چتور، نیلور اور کرشنا میں کئی علاقے مسلسل بارش کی وجہ سے زیر آب آگئے ہیں۔
سمندری طوفان میچنگ 5 دسمبر کو اے پی سے ٹکرائے گا۔ محکمہ موسمیات کے مطابق یہ دباو شدید طوفان میں تبدیل ہو گیا ہے جو5 دسمبر کی صبح نیلور اور مچھلی پٹنم کے درمیان ساحل کو عبور کرے گا۔اس دوران 80تا 90 کلومیٹر کی رفتار سے طوفانی ہوائیں چلیں گی۔
محکمہ موسمیات نے کہا کہ طوفان کے اثر سے اوڈیشہ اور اے پی میں شدید سے شدید ترین بارش ہوگی۔ ماہی گیروں کو خبردار کیا گیا ہے کہ وہ سمندر میں نہ جائیں۔ یہ طوفان شمال مغرب کی طرف پیش قدمی کررہا ہے جو بتدریج شمالی تامل ناڈو اور جنوبی ساحل میں شدید طوفان کی شکل اختیار کرلے گا۔
محکمہ موسمیات کے حکام نے کہا کہ 5 دسمبر کی صبح اونگول اور مچھلی پٹنم کے درمیان یہ طوفان ساحل کو عبور کرے گا۔ شدید طوفان کے ساحل سے ٹکراتے ہی جنوبی ساحلی اور شمالی ساحلی علاقوں میں شدید ہوائیں چلیں گی۔ محکمہ موسمیات نے کہا کہ ہواؤں کی شدت سے سمندر میں لہریں ایک میٹر سے ڈیڑھ میٹر تک بلند ہوں گی۔
