Imran Hussain 
بی جے پی کے قومی جنرل سکریٹری ورکن پارلیمنٹ بنڈی سنجے کمار نے کالیشورم پراجکٹ کی جانچ پر دوہری پالیسی اختیار کرنے پر کانگریس حکومت پر تنقید کی۔انہوں نے آج صبح اے بی وی پی کریم نگر شاخ کے زیراہتمام گیتا بھون اسکوائر سے نکالی گئی تھری کے رن میں حصہ لیا۔
بنڈی سنجے نے سوال کیا کہ کانگریس حکومت سی بی آئی کے ذریعہ کالیشورم پراجکٹ میں ہوئی بدعنوانیوں کی جانچ کیوں نہیں کر وارہی ہے؟ جبکہ کانگریس نے کالیشورم پراجکٹ کی تعمیر میں ایک لاکھ کروڑ روپے کی بدعنوانی کا الزام لگایا ہے، انہوں نے پوچھا کہ مکمل کالیشورم پراجکٹ کی تعمیر میں ہوئی بے ضابطگیوں کی کوئی جانچ کیوں نہیں کروائی جارہی ہے؟ کانگریس کے لیڈران صرف میڈی گڈا بیریج کے معاملہ پر عدالتی جانچ کی کیوں مانگ رہے ہیں؟
بنڈی سنجے نے کہا کہ کانگریس کی دوہری پالیسیوں کے لیے اس سے زیادہ ثبوت اور کیا چاہیے۔ انہوں نے زوردیتے ہوئے کہا کہ کالیشورم پراجکٹ کی جانچ سی بی آئی سے ہونی چاہیے۔ انہوں نے واضح کیا کہ بی جے پی ریاست اور عوام کے مفاد کے لیے کانگریس حکومت کے ساتھ مکمل تعاون کرنے کے لیے تیار ہے۔
بی جےپی لیڈر نے ساتھ ہی رام مندر تقریب میں شرکت نہ کرنے کانگریس کے فیصلہ پر تنقید کی۔انہوں نے کہاکہ حیرت کی بات ہے کہ کانگریس کے اعلیٰ لیڈروں نے اس پروگرام کا بائیکاٹ کیا۔ کانگریس کے لیے کسی مقدس پروگرام پر سیاست کرنا مناسب نہیں ہے۔
